ഒറീസ്സയിൽ ആദിവാസികളുടെ ഉജ്‌ജ്വല സമരം വിജയത്തിലേയ്ക്ക് ,…
ഒഡീഷയിലെ സുന്ദർഗഡ് ജില്ലയിലെ അയ്യായിരത്തോളം വരുന്ന ആദിവാസി സമൂഹം ഡാൽമിയ സിമന്റ് കമ്പനി തങ്ങളുടെ ഭൂമി അനധികൃതമായി കൈവശപ്പെടുത്തിയെന്നാരോപിച്ച് ഒക്ടോബർ 21 ന് ജില്ലാ കളക്ടറുടെ ഓഫീസ് ഉപരോധിച്ചു.
‘ജനസംഗതൻ ഫോറം ഫോർ ഗ്രാമസഭ’ എന്ന ബാനറിന് കീഴിൽ, ജില്ലയിലെ അഞ്ച് പഞ്ചായത്തുകളിലെ അംഗങ്ങൾ – രാജ്ഗംഗ്പൂർ ബ്ലോക്കിലെ കുക്കുഡ, അലന്ദ, കേസരമാൽ, ജഗർപൂർ പഞ്ചായത്തുകളും കുത്ര ബ്ലോക്കിലെ കെടാങ് പഞ്ചായത്തും – പ്രകടനത്തിൽ പങ്കെടുത്തു.
പ്രതിഷേധിച്ച 5,000 ആദിവാസികൾ 100 കി.മീപദയാത്ര നടത്തിക്കൊണ്ട് ഒക്ടോബർ 18-ന് രാംഭലിൽ നിന്ന്, ഒക്ടോബർ 21-ന് കലക്ടറുടെ ഓഫീസിൽ എത്തിച്ചേർന്നു. അന്ന് രാത്രി, കലക്ടറുമായി കൂടിക്കാഴ്ച നടത്തണമെന്ന് ആവശ്യപ്പെട്ട് സമരക്കാരായ ആദിവാസി അംഗങ്ങൾ തണുപ്പത്ത് രാത്രി കഴിച്ചുകൂട്ടി.
അവരുടെ യാത്രയും ആവശ്യങ്ങളും വിശദമാക്കി ഒക്ടോബർ 24 തിങ്കളാഴ്ച സംഘം സംയുക്ത പത്രപ്രസ്താവനയും പുറത്തിറക്കി.
മേൽപ്പറഞ്ഞ പഞ്ചായത്തുകൾക്ക് കീഴിലുള്ള അവരുടെ 750 ഏക്കർ ഭൂമി “അനധികൃതമായി ഡാൽമിയ സിമന്റ് കമ്പനിക്ക്” (മുമ്പ് ഒഡീഷ സിമന്റ് ലിമിറ്റഡ്; ഒസിഎൽ) പതിച്ചുനൽകിയിരിക്കുകയാണെന്ന് സംഘം പ്രസ്താവനയിൽ പറഞ്ഞു.
ഈ ഭൂമി ഇടപാട് നടന്നാൽ 57 വില്ലേജുകളിലെ 60,000 ആദിവാസികൾ കുടിയിറക്കപ്പെടുകയും തൊഴിൽരഹിതരാകുകയും ചെയ്യുമെന്ന് പ്രസ്താവനയിൽ ആരോപിച്ചു. ആദിവാസികളുടെ നിലനിൽപ്പ് തന്നെ ഇല്ലാതാവുമെന്ന് അവർ ചൂണ്ടിക്കാട്ടി.
“ആദിവാസികളായ ഞങ്ങൾക്ക് ഭൂമി ഒരു ഉപജീവനമാർഗ്ഗം മാത്രമല്ല; അത് നമ്മുടെ ശരീരത്തിന്റെ ഒരു ഭാഗം പോലെയാണ്,” ഗ്രാമസഭാ പ്രസിഡൻറ് ബിബോൾ ടോപെ പറഞ്ഞു. “ഭൂമി ഞങ്ങളുടെ ജീവിതം, സ്വത്വം, സംസ്കാരം, ഭാഷ എന്നിവയുമായി ബന്ധപ്പെട്ടിരിക്കുന്നു. അതുകൊണ്ടാണ് 2017-ൽ ഞങ്ങളുടെ ഭൂമി സംരക്ഷിക്കാൻ ഞങ്ങൾ ഈ പ്രസ്ഥാനം ആരംഭിച്ചത്. ” എന്നും
“ഡാൽമിയ കമ്പനിക്ക് അര ഇഞ്ച് ഭൂമി പോലും നൽകുന്നതിന് മുമ്പ് ഞങ്ങൾ ഞങ്ങളുടെ ജീവൻ നൽകും,” എന്നും അദ്ദേഹം കൂട്ടിച്ചേർത്തു.
ഡാൽമിയ-ഒസിഎൽ, സ്വകാര്യ കമ്പനിയായ ഡാൽമിയ ഭാരതിന് 2,150 ഏക്കർ ഭൂമി കൂടി നൽകി മേഖലയിൽ ഖനന പ്രവർത്തനങ്ങൾ വിപുലീകരിക്കാൻ സർക്കാർ ശ്രമിക്കുകയാണ്. ഈ വിപുലീകരണത്തിന്റെ ആദ്യഘട്ടം പൂർത്തിയാക്കാൻ കമ്പനിക്ക് 750 ഏക്കർ ഭൂമി ഏറ്റെടുത്തിരിക്കയാണ്.
ഒക്ടോബർ 21ന് രാവിലെ 10ന് കലക്ടറുടെ ഓഫീസിന് മുന്നിൽ സമരക്കാരായ ആദിവാസികൾ എത്തുമ്പോൾ ഉദ്യോഗസ്ഥർ ഓഫീസിൽ നിന്ന് പുറത്തിറങ്ങി സമരക്കാരിൽ നിന്ന് മെമ്മോറാണ്ടം വാങ്ങണമെന്നും ആരോപണത്തെക്കുറിച്ച് അന്വേഷിക്കുമെന്ന് ഉറപ്പ് നൽകണമെന്നും ആവശ്യപ്പെട്ടിരുന്നു.
എന്നാൽ, കളക്ടറുടെ ഓഫീസിൽ നിന്ന് ഒരു ഉദ്യോഗസ്ഥൻ പോലും പുറത്തിറങ്ങിയില്ല. പകരം, നാല് പ്രതിനിധികളെ തിരഞ്ഞെടുത്ത് കളക്ടർക്ക് അദ്ദേഹത്തിന്റെ ഓഫീസിലെത്തി മെമ്മോറാണ്ടം നൽകാൻ ആദിവാസികളോട് പറഞ്ഞു.
തുടർന്ന്, സ്ഥലത്ത് പ്രതിഷേധം ശക്തമായതോടെ കളക്ടറുടെ ഓഫീസും അദ്ദേഹത്തിന്റെ വസതിയും “നാലു ഭാഗത്തുനിന്നും” അടച്ചു.
അന്ന് വൈകിട്ട് 7 മണിയോടെ സമരക്കാരുടെ സമ്മർദ്ദത്തെത്തുടർന്ന് ജനക്കൂട്ടത്തെ അഭിസംബോധന ചെയ്യാൻ കളക്ടർ പുറത്തിറങ്ങുകയും അടുത്ത ദിവസം തന്നെ കാണാൻ 25 പ്രതിനിധികളെ വിളിക്കുകയും ചെയ്തു. മറ്റ് ക്രമീകരണങ്ങളൊന്നും ഇല്ലാത്തതിനാൽ, 5,000 പ്രതിഷേധക്കാർ വീണ്ടും രാത്രി തുറസ്സായ സ്ഥലത്ത് ചെലവഴിക്കാൻ നിർബന്ധിതരായി.
അടുത്ത ദിവസം, ഒക്ടോബർ 22 ന്, കളക്ടർ ഫോറത്തിലെ 25 പ്രതിനിധികളുമായി കൂടിക്കാഴ്ച നടത്തി. മെമ്മോറാണ്ടം കലക്ടർ ശ്രദ്ധിക്കുകയും ഒഡീഷ മുഖ്യമന്ത്രിക്കും ഗവർണർക്കും കൂടാതെ ഇന്ത്യൻ രാഷ്ട്രപതിക്കും മെമ്മോറാണ്ടം അയയ്ക്കുമെന്ന് രേഖാമൂലം ഉറപ്പ് നൽകുകയും ചെയ്തു. , മറുപടി ലഭിക്കുന്നതുവരെ ഭൂമി ഏറ്റെടുക്കൽ നടപടികൾ നിർത്തിവെക്കുമെന്നും കലക്ടർ പറഞ്ഞു.
അനധികൃത സ്ഥലമെടുപ്പ് നിർത്തുന്നത് വരെ സമരക്കാർക്ക് 100-200 അംഗങ്ങൾക്ക് പ്രതിഷേധിക്കാൻ കലക്ടറുടെ ഓഫീസിന് പുറത്ത് സ്ഥലം നൽകണമെന്നും വെള്ളവും മൊബൈൽ ടോയ്‌ലറ്റുകളും ഒരുക്കണമെന്നും സമരക്കാരായ ആദിവാസികൾ ആവശ്യപ്പെട്ടിരുന്നു. ഇക്കാര്യത്തിലും 10 ദിവസത്തിനകം ക്രമീകരണം നടത്തുമെന്ന് കളക്ടർ ഉറപ്പ് നൽകി.
തുടർന്ന് ജില്ലാ ഭരണകൂടത്തിന്റെ യോഗത്തിൽ പങ്കെടുത്ത പ്രതിനിധികൾ ജനക്കൂട്ടത്തെ അറിയിക്കുകയും അന്ന് വൈകിട്ട് 4 മണിക്ക് സമരം ചെയ്യുന്ന ആദിവാസികളെ സുരക്ഷിതമായി വീടുകളിലെത്തിക്കാൻ ബസുകൾ നടപടികൾ ക്രമീകരിക്കുകയും ചെയ്തു.
ഇന്ത്യയിലെ അടിച്ചമർത്തപ്പെട്ട ജനവിഭാഗങ്ങൾ നടത്തുന്ന യഥാർത്ഥ പോരാട്ടങ്ങളെ , അവരുടെ പോരാട്ട ബോധത്തെ തിരിച്ചറിയുക..
(എഫ് ബി പോസ്റ്റ്)
ജയരാജൻ സി എൻ