“100% ഡിസ്പോസിബിൾ ” ആയി കാണേണ്ടവരാണോ കോർപ്പറേറ്റ് സ്ഥാപനങ്ങളിലെ ജീവനക്കാർ ?!
16 വർഷത്തിലേറെക്കാലം ജോലി ചെയ്തു കൊണ്ടിരുന്ന എഞ്ചിനീയറെ അടക്കം 12000 പേരെ ഒരു കാര്യവും കാണിയ്ക്കാതെ പുലർച്ചെ 3 മണിക്കും മറ്റും പിരിച്ചുവിടുന്ന ‘മഹത്തായ കോർപ്പറേറ്റ് സംസ്കാരം’ ഗൂഗിൾ കാഴ്ച വെച്ചിരിക്കുന്നു…
ഗൂഗിളിന്റെ മാതൃ കമ്പനിയായ ആൽഫബെറ്റ് 12,000 ജീവനക്കാരെ പിരിച്ചുവിട്ടു . സിഇഓ സുന്ദർ പിച്ചൈയുടെ മെമ്മോയിലൂടെയാണ് ജോലി വെട്ടിക്കുറച്ച വിവരം ജീവനക്കാരെ അറിയിച്ചത്.
16.5 വർഷത്തിലേറെയായി ഗൂഗിളിൽ ജോലി ചെയ്ത ജസ്റ്റിൻ മൂർ എന്ന സോഫ്റ്റ്‌വെയർ എഞ്ചിനീയറിംഗ് മാനേജരുടെയും അക്കൗണ്ട് പുലർച്ചെ 3 മണിക്ക് നിർജ്ജീവമാക്കിയതിനെ തുടർന്ന് പിരിച്ചുവിട്ടു…
ഒരു ലിങ്ക്ഡ്ഇൻ പോസ്റ്റിൽ ജസ്റ്റിൻ മൂർ എഴുതി:
“ആയതിനാൽ ഗൂഗിളിൽ 16.5 വർഷത്തിലേറെയായതിന് ശേഷം, ഇന്ന് പുലർച്ചെ 3 മണിക്ക് ഒരു ഓട്ടോമേറ്റഡ് അക്കൗണ്ട് നിർജ്ജീവമാക്കൽ വഴി ‘ഭാഗ്യവാന്മാരായ’ 12,000 പേരിൽ ഒരാളായി എന്നെ വിട്ടയച്ചതായി കാണപ്പെട്ടിരിക്കുന്നു. എനിക്ക് മറ്റ് വിവരങ്ങളൊന്നും ലഭിച്ചിട്ടില്ല. കൂടാതെ “നിങ്ങളെ വിട്ടയച്ചു” എന്നറിയിച്ച വെബ്‌സൈറ്റിൽ ( പിരിച്ചു വിട്ടതിനാൽ എനിക്ക് ഇപ്പോൾ ആക്‌സസ് ചെയ്യാൻ കഴിയില്ല) എനിക്ക് ലഭിക്കണമെന്ന് പറഞ്ഞ മറ്റ് ആശയവിനിമയങ്ങളൊന്നും ലഭിച്ചിട്ടില്ല.”
ഇനിപ്പറയുന്ന വരികൾ കോർപ്പറേറ്റ് ഭക്തന്മാർക്ക് വേണ്ടിയുള്ളതാണ്…അദ്ദേഹം തുടരുന്നു:
“ജോലിയല്ല നിങ്ങളുടെ ജീവിതത്തെ നയിക്കുന്നത് എന്ന് ഇത് ബോദ്ധ്യപ്പെടുത്തിത്തരുന്നു. വിശേഷിച്ച് തൊഴിലുടമകൾ — പ്രത്യേകിച്ച് ഗൂഗിൾ പോലുള്ള വലിയ, മനുഷ്യപ്പറ്റില്ലാത്ത സ്ഥാപനങ്ങൾ — നിങ്ങളെ 100% ഡിസ്പോസിബിൾ ആയി കാണുന്നു. ജോലിയെയല്ല, ജീവിതത്തെ നയിക്കുക..”
അദ്ദേഹം തുടർന്ന് തന്റെ അച്ഛൻ പറഞ്ഞു കേട്ട കാവ്യമൊഴി പറഞ്ഞവസാനിപ്പിക്കുന്നു…
“കുറച്ചു നേരം ഞാൻ ചോരയൊലിപ്പിച്ചു കിടക്കും
പിന്നെ ഞാൻ ഉയിർത്തെഴുന്നേൽക്കും, പോരാട്ടം തുടരും”
(എഫ് ബിയിൽ നിന്ന്)