മുസ്ലിം വിരുദ്ധവും മതേതര വിരുദ്ധവും ഭരണഘടനാ വിരുദ്ധവുമായ സിഎഎ അടിച്ചേൽപ്പിക്കാനുള്ള മോദി സർക്കാരിന്റെ നീക്കത്തെ ചെറുത്തു തോൽപ്പിക്കുക.
2019 ഡിസംബർ 11 ന് പാർലമെൻ്റ് പാസാക്കിയ പൗരത്വ (ഭേദഗതി) നിയമം (സിഎഎ) അടിച്ചേൽപ്പിക്കുവാൻ മോദി സർക്കാർ ശ്രമിച്ചെങ്കിലും, രാജ്യവ്യാപകമായി നടന്ന വൻ പ്രതിഷേധത്തെത്തുടർന്ന് അത് മുന്നോട്ട് കൊണ്ടുപോകാൻ കഴിയാതെ അത് മരവിപ്പിക്കാൻ നിർബന്ധിതരായി. ഇതുവരെ, സിഎഎയ്‌ക്കെതിരായ വിവിധ കേസുകളിൽ സുപ്രീം കോടതിയിൽ മോദി സർക്കാരിൻ്റെ പ്രതികരണം സിഎഎ സംബന്ധിച്ച ചട്ടങ്ങൾ ഇതുവരെ രൂപപ്പെടുത്തിയിട്ടില്ലെന്നായിരുന്നു. ഈ സാഹചര്യത്തിലാണ്, രാമക്ഷേത്ര പ്രതിഷ്ഠയുടെ തുടർച്ചയായി, തിരഞ്ഞെടുപ്പ് വിജ്ഞാപനത്തിൻ്റെ തലേന്ന്, മുസ്ലീങ്ങൾക്കെതിരെ പരമാവധി ഭൂരിപക്ഷ ഹിന്ദുത്വ ധ്രുവീകരണം സൃഷ്ടിക്കുക എന്ന ലക്ഷ്യത്തോടെ, 2024 മാർച്ച് 11 ന് മോദി സർക്കാർ. സിഎഎയുമായി ബന്ധപ്പെട്ട് തീർപ്പാക്കാത്ത നിരവധി കേസുകളിൽ സുപ്രീം കോടതി ഇതുവരെ തീരുമാനമെടുത്തിട്ടില്ലെങ്കിലും, 2024 ലെ സിഎഎ ചട്ടങ്ങളുടെ വിജ്ഞാപനവുമായി മുന്നോട്ടു
വന്നിരിക്കുന്നത്.
2014 ന് മുമ്പ് ഇന്ത്യയിലെത്തിയ അഫ്ഗാനിസ്ഥാൻ, ബംഗ്ലാദേശ്, പാകിസ്ഥാൻ എന്നിവിടങ്ങളിൽ നിന്നുള്ള 6 മുസ്ലീം ഇതര സമുദായങ്ങൾക്ക് മാത്രമാണ് സി എ എ ഇന്ത്യൻ പൗരത്വം അനുവദിക്കുന്നത്, അതേസമയം മുസ്ലീങ്ങളെ പൂർണ്ണമായും ഒഴിവാക്കിയിരിക്കുകയാണ്. 2019-20 കാലഘട്ടത്തിൽ എല്ലാ വിഭാഗങ്ങളിലുമുള്ള ജനങ്ങളെ പ്രതിനിധീകരിക്കുന്ന പാർട്ടികളുടെയും സംഘടനകളുടെയും പ്രസ്ഥാനങ്ങളുടെയും വിശാലമായ സ്പെക്ട്രം തന്നെ മുസ്ലീങ്ങളെ പ്രത്യേകമായി ലക്ഷ്യം വച്ചുള്ള ഈ നീക്കത്തെ ശക്തമായി എതിർക്കുകയും ഇതിന് പിന്നിലെ ഹിന്ദുരാഷ്ട്ര അജണ്ട തുറന്നുകാട്ടുകയും ചെയ്തിരുന്നു. സി എ എ പൗരത്വ നിയമം, 1955 ലംഘിക്കുക മാത്രമല്ല, ആർട്ടിക്കിൾ 25 മുതൽ 28 വരെയുള്ള ഭരണഘടനയുടെ മതേതര സ്വഭാവത്തെയും ഇന്ത്യൻ ഭരണഘടനയുടെ ആർട്ടിക്കിൾ 14 അനുസരിച്ച് തുല്യതയ്ക്കുള്ള അവകാശത്തെയും ദുർബലപ്പെടുത്തുന്നു. ഇന്ത്യൻ ഭരണഘടന അനുസരിച്ച്, പൗരത്വം മതനിരപേക്ഷമാണ്. മാത്രമല്ല, പൗരത്വത്തിൻ്റെ മാനദണ്ഡമായി മതം ചേർക്കുന്നത് ഭരണഘടനയുടെ അടിസ്ഥാന സ്വഭാവത്തിനു തന്നെ വിരുദ്ധമാണ്.
എന്നാൽ, പൊതുതിരഞ്ഞെടുപ്പ് അടുത്തിരിക്കെ, ലോകത്തിലെ ഏറ്റവും വലുതും പഴക്കമുള്ളതുമായ ഫാസിസ്റ്റ് സംഘടനയായ ആർഎസ്എസ്, അതിൻ്റെ രാഷ്ട്രീയ ഉപകരണമായ ബി.ജെ.പിയെ ഉപയോഗിച്ച്, ഹിന്ദുരാഷ്ട്രം അഥവാ ‘രാമരാജ്യം’ സ്ഥാപിക്കുക എന്ന ആത്യന്തിക ലക്ഷ്യത്തിലേക്കുള്ള ഓട്ടപ്പാച്ചിലിലാണ്. ആർ എസ് എസിന്റെ മുൻ മേധാവി ഗോൾവാൾക്കർ വിഭാവനം ചെയ്തതു പോലെ ഈ ഹിന്ദുരാഷ്ട്രത്തിൽ മുസ്‌ലിംകൾ ‘രാഷ്ട്ര’ത്തിന്റെ ഒന്നാം നമ്പർ ശത്രുക്കളായി കണക്കാക്കപ്പെടുന്നതാണ്., ഈ വീക്ഷണകോണിൽ നോക്കുമ്പോൾ, കൃത്യമായി പറഞ്ഞാൽ, സിഎഎ പരോക്ഷമായി, മുസ്‌ലീങ്ങളെയപ്പാടെ നിയമസാധുതയില്ലാത്ത ഒരു വിഭാഗമാക്കി മാറ്റുകയാണ് ചെയ്യുന്നത്. അങ്ങനെ, ആർട്ടിക്കിൾ 370 റദ്ദാക്കൽ, ബാബറി മസ്ജിദ് തകർത്ത് അതേ സ്ഥലത്തു തന്നെ രാമക്ഷേത്രം പടുത്തുയർത്തൽ, ഏകീകൃത സിവിൽ കോഡ് തുടങ്ങി മുസ്ലീം വിരുദ്ധ-ഇസ്ലാമോഫോബിക് നടപടികളുടെ തുടർച്ചയായി, ആർഎസ്എസിൻ്റെ കൽപ്പനകൾ അനുസരിച്ച്,. വരാനിരിക്കുന്ന തെരഞ്ഞെടുപ്പിൽ പാർലമെൻ്റിൽ 400 സീറ്റുകൾ പിടിച്ചെടുക്കാനുള്ള ‘മിഷൻ 400’ കൈവരിക്കുന്നതിനു വേണ്ടി ഭൂരിപക്ഷ ധ്രുവീകരണത്തിന് മോദി സർക്കാർ ഇപ്പോൾ വേഗത കൂട്ടുകയാണ്. അതിനായുള്ള ഏറ്റവും പുതിയ ഫാസിസ്റ്റ് ആയുധമാണ് സിഎഎ.
ഇപ്പോൾ, പൊതുതിരഞ്ഞെടുപ്പിൻ്റെ തലേന്ന്, മോദി സർക്കാർ തിടുക്കത്തിൽ സിഎഎ ചട്ടങ്ങൾ വിജ്ഞാപനം ചെയ്തതോടെ, ഇന്ത്യയൊട്ടാകെ പ്രതിഷേധം ഉയരുകയാണ്. ഈ സാഹചര്യത്തിൽ, പ്രതിപക്ഷം ഭരിക്കുന്ന ചില സംസ്ഥാന സർക്കാരുകൾ അതത് സംസ്ഥാനങ്ങളിൽ സിഎഎ നടപ്പാക്കില്ലെന്ന് പ്രഖ്യാപിച്ചിട്ടുണ്ട്. എന്നാൽ, ഇതിനകം വിജ്ഞാപനം ചെയ്ത ചട്ടങ്ങൾ അനുസരിച്ച് ഇത് അസാധ്യമാണ്. കാരണം, 2024ലെ സിഎഎ ചട്ടങ്ങൾ അനുസരിച്ച്, സിഎഎ നടപ്പാക്കുന്നതിന്റെ മുഴുവൻ പ്രക്രിയയും കേന്ദ്രത്തിലെ കോർപ്പറേറ്റ്-കാവി ഫാസിസ്റ്റ് ഭരണകൂടത്തിന്റെ ഉറച്ച ഭരണപരമായ നിയന്ത്രണത്തിൻ കീഴിലാണ്. അപേക്ഷകൾ സ്വീകരിക്കുന്നതു മുതൽ പൗരത്വം നല്കുന്നതിനായുള്ള പശ്ചാത്തല – സുരക്ഷാ പരിശോധനകൾ ഉൾപ്പെടെയുള്ള മുഴുവൻ കാര്യങ്ങളും നടപ്പാക്കാൻ കേന്ദ്ര സർക്കാരിന്റെ നേരിട്ടുള്ള നിയന്ത്രണത്തിലുള്ള സെൻസസ് ഓപ്പറേഷൻസ് ഉദ്യോഗസ്ഥർ, ഐബിയിലെ ഉദ്യോഗസ്ഥർ, പോസ്റ്റ് മാസ്റ്റർ ജനറൽ, ഇൻഫോർമാറ്റിക്സ് സെൻ്റർ ഉദ്യോഗസ്ഥർ എന്നിവരടങ്ങുന്ന കമ്മിറ്റികളെയാണ് ചുമതലപ്പെടുത്തിയിരിക്കുന്നത്. കേന്ദ്രം സംസ്ഥാനവുമായി കൂടിയാലോചിക്കണമെന്ന് വ്യവസ്ഥ ചെയ്യുന്ന 2009 ലെ പൗരത്വ നിയമങ്ങളിലെ വ്യവസ്ഥകൾ ഇപ്പോൾ വിജ്ഞാപനം ചെയ്ത CAA ചട്ടങ്ങൾ അനുസരിച്ച് പൂർണ്ണമായും ലംഘിക്കപ്പെട്ടിരിക്കുന്നു. അങ്ങനെ, ഫെഡറലിസവും CAA യുടെ ഇരകളിലൊന്നായി മാറിയിരിക്കുന്നു. മാത്രമല്ല, സംസ്ഥാനങ്ങളുടെ അധികാരങ്ങളും വളരെ പരിമിതമാണ് താനും. കൂടാതെ, ആർട്ടിക്കിൾ 256 പ്രകാരം പാർലമെൻ്റ് പാസാക്കിയ നിയമങ്ങൾക്കനുസൃതമായി മാത്രമേ സംസ്ഥാനങ്ങളിൽ ഭരണം നടത്താവൂ എന്ന് വ്യവസ്ഥ ചെയ്തിരിക്കുന്നതിനാൽ, സംസ്ഥാന സർക്കാരുകളുടെ എതിർപ്പിനെ മറികടക്കാനായി ആർട്ടിക്കിൾ 356 പ്രയോഗിക്കുവാൻ ഫാസിസ്റ്റുകൾ മടിക്കുകയില്ല.
നവലിബറൽ കാലഘട്ടത്തിലെ ഫാസിസം ആഗോള തലത്തിൽ തഴച്ചുവളരുന്നത് ഇസ്‌ലാമോഫോബിയയെ അതിന്റെ പ്രത്യയശാസ്ത്രപരമായ അടിത്തറയായി ഫലപ്രദമായി ഉപയോഗപ്പെടുത്തിക്കൊണ്ടാണ് എന്നതിൽ സംശയമില്ല. സയണിസ്റ്റുകൾ നടത്തുന്ന പലസ്തീനി ഉന്മൂലനവും യൂറോപ്പിലുടനീളവും അമേരിക്കയിലും ഏഷ്യയിലെ പല രാജ്യങ്ങളിലും “ഇസ്ലാംവൽക്കരണവും ” “മുസ്ലിം വിരുദ്ധതയും” ഒരു കൂട്ടം നവ-ഫാസിസ്റ്റ് പാർട്ടികളുടെയും ഭരണ ഭരണകൂടങ്ങളുടെയും ഇഷ്ട വിഷയമായി മാറിയിരിക്കുന്നു. ഇന്ത്യയിൽ, ആർഎസ്എസ്/ബിജെപി ഈ ഹീനകൃത്യത്തിൽ സമർത്ഥരാണ്. ഇന്ത്യയുടെ അയൽരാജ്യങ്ങളിലെ ന്യൂനപക്ഷ പീഡനങ്ങളിൽ മുതലക്കണ്ണീരൊഴുക്കുന്ന ആർഎസ്എസ് സൈദ്ധാന്തികർ, മ്യാൻമറിൽ നിന്നുള്ള ഏറ്റവും കൂടുതൽ പീഡിപ്പിക്കപ്പെടുന്ന റോഹിങ്ക്യൻ അഭയാർഥികളെയും പാക്കിസ്ഥാനിലെ അഹമ്മദീയരെയും തമിഴ്നാട്ടിലെ ക്യാമ്പുകളിൽ കഴിയുന്ന ഇന്ത്യൻ പൗരത്വമാഗ്രഹിക്കുന്ന പതിനായിരക്കണക്കിന് ശ്രീലങ്കൻ അഭയാർഥികളെയും കണ്ടില്ലെന്നു നടിക്കുന്നു. ഇതിൽ ഉൾപ്പെട്ടിരിക്കുന്ന ആർഎസ്എസ് / ബിജെപി യുടെ ഫാസിസ്റ്റ് ഇരട്ടത്താപ്പ് തുറന്നുകാട്ടുകയും ഈ മുസ്ലീം വിരുദ്ധ നീക്കത്തെ ചെറുത്ത് തോൽപ്പിക്കുകയും ചെയ്യുകയെന്നത് ജനാധിപത്യവാദികളും സുമനസ്സുകളുമായ എല്ലാവരുടെയും കടമയാണ്.
മതത്തെ പൗരത്വത്തിനുള്ള അടിസ്ഥാനമാക്കുന്നതോടെ സിഎഎയുടെയും ഒപ്പം എൻആർസിയുടെയും (ആസാമിൽ മാത്രം 4 ദശലക്ഷം പൗരത്വം ഇല്ലാതാക്കുമെന്ന് പ്രതീക്ഷിക്കുന്ന ദേശീയ പൗരന്മാരുടെ രജിസ്റ്റർ) അനന്തരഫലമായി “ജനാധിപത്യത്തിന്റെ ഈറ്റില്ലം ” എന്ന് കൊട്ടിഘോഷിക്കപ്പെടുന്ന ഇന്ത്യയിലെ, ദശലക്ഷക്കണക്കിന് ആളുകളെ അഭയാർത്ഥികളും അടിസ്ഥാന മനുഷ്യാവകാശങ്ങൾ പോലും ഇല്ലാത്ത, രാജ്യമില്ലാത്ത അശരണരും അല്ലെങ്കിൽ “നുഴഞ്ഞുകയറ്റക്കാരും” അയി ചിത്രീകരിച്ച് ഫാസിസ്റ്റു ഭരണകൂട മർദ്ദനങ്ങൾക്കിരയാക്കി കാവി ഗുണ്ടകൾ അഴിഞ്ഞാടുന്ന തെരുവോരങ്ങളിലേക്ക് തള്ളി വിടുകയാണ് ചെയ്യുന്നത്. ഫാസിസ്റ്റ് ഭീകരതയുടെ ഒരു യഥാർത്ഥ തടവറയായി ഈ രാജ്യം മാറും. ഇന്ത്യയിലെ പല മുസ്ലീം കുടിയേറ്റക്കാരെയും നിർബന്ധിതമായി നാടുകടത്തുകയോ ട്രാൻസിറ്റ് ക്യാമ്പുകളിലോ തടങ്കൽ പാളയങ്ങളിലോ പാർപ്പിക്കുകയോ ചെയ്യുമെന്ന ഭയം അടിച്ചമർത്തപ്പെട്ട മുസ്ലീം സമുദായങ്ങൾക്കിടയിൽ ഉണ്ട്.
ഈ ഭയാനകമായ ഘട്ടത്തിൽ, ഈ ഭൂരിപക്ഷ ഫാസിസ്റ്റ് നടപടിയുടെ ഇരകളോട് ഐക്യദാർഢ്യത്തോടെ നിൽക്കുക എന്നത് മതേതരത്വവും ജനാധിപത്യവും ഉയർത്തിപ്പിടിക്കുന്ന എല്ലാ ജനങ്ങളുടെയും കടമയാണ്. സിഎഎയുടെ അടിച്ചേൽപ്പിക്കുന്നതിന്റെ ഫലമായി ഉയർന്നുവരുന്ന ആസന്നമായ ഭീഷണി ഒഴിവാക്കാൻ, വരുന്ന ലോക്‌സഭാ തെരഞ്ഞെടുപ്പിൽ ആർഎസ്എസ്/ബിജെപിയെയും അതിന്റെ ഫാസിസ്റ്റ് സഖ്യകക്ഷികളെയും പരാജയപ്പെടുത്തുവാനായി മുന്നിട്ടിറങ്ങുക എന്നതാണ് ഏക പോംവഴി. എല്ലാ ജനാധിപത്യ ശക്തികളോടും അടിച്ചമർത്തപ്പെട്ട മുസ്ലീം ന്യൂനപക്ഷങ്ങളുടെ പ്രസ്ഥാനങ്ങളോടും ദളിതരും ആദിവാസികളും തൊഴിലാളികളും കർഷകരും സ്ത്രീകളും എല്ലാ അധ്വാനിക്കുന്ന ജനങ്ങളും യുവാക്കളും വിദ്യാർത്ഥികളും ഉൾപ്പെടെയുള്ള എല്ലാ അടിച്ചമർത്തപ്പെട്ട വിഭാഗങ്ങളോടുംഈ അടിയന്തിര കടമ ഏറ്റെടുക്കുവാനും അതു വഴി സിഎഎ അടക്കമുള്ള വിനാശകരമായ നടപടികളെ ചെറുത്ത് തോൽപ്പിക്കുവാനും ഞങ്ങൾ അഭ്യർത്ഥിക്കുന്നു.
പി ജെ ജെയിംസ്
ജനറൽ സെക്രട്ടറി
സിപിഐ (എംഎൽ) റെഡ്സ്റ്റാർ
ന്യൂ ഡെൽഹി
2024 മാർച്ച് 13